تركتها لأجله بقلم اسراء ابراهيم

اسكربت
انت اكيد مش هتسيبني صح  
عمر بحيرة غصب عني يا مريم انتي عارفة اني بحبك بس ده اخويا وانا مش هقدر اقف في طريق سعادته 
مريم بغضب تقوم تدوس علي قلبي انا وتقف في طريق حبنا انت فاكر انك كدة بتضحي عشانه هو اصلا لو مكانك صدقني كان هيتجوز ومش هيفرق معاه اي حاجة
عمر بجدية حتي لو فعلا اسلام مكنش هيعمل اللي انا عملته ده بس عالاقل انا ريحت ضميري وعملت بأصلي وتربيتي يا مريم
مريم بقهرة عملت ايه سيبت خطيبتك عشان اخوك مراته ماتت سيبتني عشان عارف ان بابا هيرفض تأجيل الفرح اذا كان انت عارف اللي فيها يا عمر عارف اني كنت بعد الايام عشان نتجوز وابعد عن البيت وعن مرات بابا في الاخر تتخلي عني انت عارف انت كدة بتحكم عليا بإيه طب حتي حاول مع بابا اتكلم معاه قوله اننا مش هنعمل فرح انا موافقة لكن تسيبني كدة عادي 
عمر بضيق متحملنيش فوق طاقتي يا مريم انتي عارفة ان باباكي مش هيوافق اننا منعملش فرح عشان الناس متاكلش وشه وحتي لو وافق امي مش هترضي اني اتجوز واخويا لسة مراته متوفية
مريم ببهتان وهي بتقوم من مكانها عندك حق اتفضل دبلتك اهي واتمني مشوفكش تاني في حياتي يا عمر
مشيت مريم وهي من جواها حاسة انها هيجرالها حاجة لحد من وقت قريب كانت بتفكر هتعمل ايه في حياتها الجديدة مكنتش تعرف ان كل احلامها اتهدت وانها اتكتب عليها تعيش مع قمر مرات ابوها
...........................................
دخلت مريم البيت وهي باين علي وشها الحزن واليأس وكانت مش حاسة بأي حاجة حواليها غير صوت قمر اللي خرجها من حالتها
قمر بغضب انا قولت انك

منحوسة ها ياختي عملتي ايه مع سي عمر بتاعك قولتيله يتمم الجوازة دي ولا لا
مريم ببهتان خلاص يا مرات ابويا كل حاجة خلصت تخيلي اني اتكتب عليا افضل عايشة معاكي علطول بعد ما كان كلها شهر وتخلصي مني
قمر بغضب انا كان قلبي حاسس ان الجوازة دي مش هتكمل ما انتي اصلك وش فقر غوري من وشي شوفي وراكي ايه في المطبخ لحد ما اخرج اشم نفسي وارجع احسن انا خلاص جبت اخري منك ومن عمايلك وعاوزة اجي الاقي الاكل مخلصش عشان اطين عيشتك انهاردة
مريم بطاعة حاضر يا مرات ابويا
مشيت قمر واول ما خرجت من باب الشقة مسكت مريم تليفونها واتصلت علي شهد صديقة عمرها
شهد بقلق اخيرا اتصلتي انا قلقانة اوي عليكي من الصبح ها طمنيني عملتي ايه مع عمر 
مريم بحزن سابني يا شهد عمر اتخلي عني وسابني عشان اخوه تخيلي اني كنت بتحايل عليه يكلم بابا يخلي الفرح في معاده بس هو رفض وقالي ان لو حتي بابا وافق امه مش هترضي انا حاسة اني في حلم وحش ومش عارفة افوق منه
شهد بغضب الحيوان انا كنت عارفة انه هيعمل كدة طبعا ماهو مش هيقدر يوقع كلمة امه والله ده انتي ربنا نجدك منه الواد ده
مريم بقهرة المشكلة اني كنت خلاص ما صدقت اني ههرب من هنا انتي عارفة قمر بتعاملني ازاي وعلطول خناق وضرب وقلة قيمة وكنت ما صدقت اني هخلص منها
شهد بحنية معلش يا حبيبتي ده نصيب والله مش مراتات الاب وحشين ما اديكي شوفتي الهام مرات بابا بتعاملني كأني بنتها اوقات اصلا بحس الواد فارس ده مش اخويا وان هو اللي مش ابنها
مريم وهي بمسح دموعها طنط الهام دي قمر ربنا يخليهالك يا شهد يا حبيبتي يلا هقفل معاكي بقي عشان الحق اشطب المطبخ واعمل الغدا قبل ما قمر ترجع وتسود عيشتي
شهد بشفقة ماشي ياقلبي ربنا معاكي نتكلم بليل سلا
.............................................
قفلت شهد الخط مع مريم وكان باين الزعل عليها وفي نفس الوقت كانت خارجة الهام من المطبخ وشافتها كدة فقربت منها باستغراب
الهام بقلق مالك يا شهد يا حبيبتي في حاجة حصلت 
شهد بحزن مريم يا ماما الهام اللي حكتلك عليه وكنت خايفة منه حصل الزفت اللي اسمه عمر ده اتخلي عنها وسابها
الهام بضيق اخس عليه اومال ايه بيحبها ومش عارف ايه والله البت دي صعبانة عليا لو اقدر اجيبها تعيش معانا كنت عملت كدة بس
شهد باستغراب بس ايه يا ماما سكتي ليه 
الهام بتفكير جاتلي فكرة يا بت يا شهد بس بمليون جنيه عارفة لو تمت هتحل مشكلة البت مريم
شهد بشك الهااام انا مش مرتحالك حل ايه ده قولي بسرعة قبل ما الواد فارس اخويا الرخم يرجع ويقلب البيت كآبة زي عادته
الهام بخبث ماهو الواد فارس هو الحل يا هبلة انتي ركزي
شهد بصدمة اوعي يكون قصدك اللي في بالي 
الهام بثقة هو بعينه بس الفكرة بقي هنجيبهاله ازاي هو ياما سمع عن مربم صاحبتك بس مشافهاش ولا مرة
شهد بتفكير انتي عارفة فارس عندي ومش هيرضي يا ماما ده علطول بيقول عليا هبلة ازاي هنقنعه بمريم 
الهام بخبث هقولك انا بقي عشان تعرفي ان مخ امك يوزن بلد
.......................................
ايه اللي بتقوليه ده بس يا ماما جواز ايه اللي فجأة ده 
الهام بسرعة يا فارس افهم بس الاول دي البت غلبانة ومحتاجة لحد يقف جمبها
فارس بصدمة هو انتي بتقوليلي اطبطب عليها ده جواز ازاي بس اتجوز واحدة معرفهاش وكمان عاوزيني اروح اخطبها بكرة انتو وبتهزرو حتي لو فعلا هتبقي محتاجه مساعدة لكن جواز غريبة دي
شهد باقناع اسمعني بس الاول يا فارس وبعدين احكم مريم دي صاحبة عمري طول عمرها غلبانة مكنش ليها نصيب في اي فرح حتي التعليم متعلمتش بسبب ابوها امها لما ماتت ابوها اتجوز عليها بس للاسف مرات ابوها كانت بتعاملها وحش اوي وبتعتبرها خدامة وابوها حتي مپفكرش يدافع عنها ولا يعرف حتي عنها اي حاجة وعلي فكرة دي زي القمر وكانت مخطوبة كمان وكلها شهر وتتجوز بس للاسف خطيبها مطلعش راجل وعشان امها مكنتش بتحب مريم اتلككت بموت مرات اخوه وعاوزة تأجل الجوازة كام سنة وهو معترضش رغم انه عارف ظروف مريم وانها كانت مستنية اليوم اللي تهرب فيه من بيت ابوها عشان خاطري يا فارس انا عارفة ان اللي بطلبو منك صعب بس عالاقل اتجوزها وخليها تعيش معانا هنا واعتبرها مش موجودة بس تنقذها من العيشة اللي هي عايشاها
فارس بتفكير هي فعلا ظروفها صعبة وصعبت عليا بس مش لدرجة جواز يا شهد انا كان ليا خططي ومستقبلي كنت راسمه بطريقة تانية خالص
الهام بحب يا حبيبي مستقبلك ده بإيد ربنا ومين عالم مش يمكن لما تعمل خير وتنقذ البت المسكينة دي وقتها ربنا يحققلك مرادك واحسن من اللي كنت مخططله 
فارس بتنهيدة تمام يا ماما انا موافق بس ياريت تعرفوها طبيعة الجوازة دي عشان نبقي علي نور من الاول
شهد بتوتر لا ماهو انا عشان عارفة مريم كويس فمتأكدة انها لا يمكن هتوافق لو عرفت اننا هنعمل كدة وانك هتتجوزها شفقة
فارس بسخرية نعم لا المفروض ابين اني ميت فيها مش كدة