احببت عاجز بقلم اسراء ابراهيم

مش عارفة حتى أصدق إن حد زيك ممكن يطلع كويس خايفة تطلع زيهم
قصي اتأكد ان ورا زهرة حكاية هي مش عاوزة تحكيها ومش عاوزة تتكلم فيها بس واضح انها وجعتها اوي
قصي بثقة جربي مش خيرانة حاجة وبعدين مش يمكن اطلع كويس فعلا جربي ثقي فيا وصدقيني مش هتندمي يا زهرة
زهرة بصت ليه بشوية تردد وبعد ثواني قررت تمد إيدها ليه وهي بتترعش من البرد وانا مصدقاك وهجاذف يا قصي وصحيح شكرا انك نزلت ورايا وتعبت نفسك وجيت تدور عليا
قصي ابتسم وخلع چاكته ولبسه لزهرة وهو بيقولها بثقة اشكريني بعدين لما نروح البيت وعلي حظك امي عاملة محشي هيعجبك انا متأكد
رغم الدموع اللي كانت في عيون زهرة بس ضحكت لاول مرة تضحك جامد من قلبها وكأنها أخيرا لقت مكان وسكن وامان
قصي رجع مع زهرة البيت و لما دخلوا الشقة صوت الباب وهو بيتفتح كان كافي يلفت انتباه خالد أخو قصي ونور أخته المتجوزة اللي كانت جاية تزورهم 
خالد باستغراب وهو بيبص على زهرة مين دي يا قصي انا لسة كنت بسأل ماما عليك
زهرة اوترت وبصت في الارض باحراج ونور كانت متابعاها بنظرات استغراب ومش عاجبها الوضع  
مش كفاية إنك عايش لوحدك وأمي شايلة همك كمان بقيت تجيب بنات تدخلهم البيت!
زهرة كانت حاسة بكلامهم زي السكاكين اللي بتدخل في قلبها ويمكن كان صعبان عليها قصي اكتر منها وعشان كدة مقدرتش متردش عنه بس قبل ما تفتح بقها قصي قطع الكلام بصوت حاد وغضب وهو بيبصلهم
إيه ده ! إنتو ازاي كدة بتتكلموا عن البنت دي كأنها عملت حاجة غلط زهرة دي ضيفتنا ودي أول مرة تشوفوا وشها اما بالنسبة لكلامك يا استاذة نور بأن امي مستحملاني وانها شايلة همي فاحب اقولك اني عاجز اه بس اقدر اخد بالي من نفسي واوعي في يوم تنسي انك متجوزة وليكي بيت بسببي وبسبب شغلي اللي خلاني عاجز
نور اتحرجت وبصت في الارض بتوتر اما خالد فابتسم بسخرية ورد  
سيبك من الكلام اللي ملوش لازمة بس انت قولت انها ضيفتك يعني فجأة بقينا ملجأ للغرب هي مين دي أصلا عشان تستضيفها في بيتنا
زهرة

حاولت تتكلم كانت هتقول إنها تمشي وتريحهم لكن قصي ما مادهاش فرصة 
قصي بصوت عالي وهو بيبصلهم بحزم
زهرة بنت محترمة كانت في ورطة وأنا ساعدتها واللي فيكم عنده مشكلة في ده يتفضل يمشي من البيت بدل ما يتكلم عليها بالشكل ده!
نور كانت هترد لكن أمهم منال اتدخلت وقتها علشان تهدي الوضع 
منال بهدوء وهي بتتكلم مع خالد ونور 
كفاية يا ولاد كده مش كويس زهرة ضيفة عندنا ومش المفروض نتعامل بالشكل ده مع حد مالوش ذنب مش ده اللي ربتكم عليه وبحد مصدومة فيكي يا نور انتي وخالد عشان تكلمو اخوكم الكبير بالشكل ده
زهرة وقفت مكانها وهي مش عارفة تتكلم نظراتها راحت لقصي اللي كان واضح عليه إنه غضبان بسبب كلام أخوه وأخته بس من جواها كانت فرحانة لان أول مرة حد يدافع عنها بالشكل ده 
زهرة بصوت واطي وهي بتكلم قصي متشكرة إنك دافعت عني بس أنا مش عاوزة أكون سبب مشاكل ليك 
قصي بنبرة أهدى وهو بيبصلها متقلقيش إنتي مش السبب المشكلة في الناس اللي بتحكم على حد قبل ما تفهم قصته ودول اخواتي وانا عارف بتعامل معاهم ازاي
زهرة حست إن قصي كلامه وصل لقلبها وكأنها لقيت شخص فاهم ألامها اللي كانت بتعيشها طول حياتها اما نور وخالد سكتوا بعدها واضح إنهم فهموا إن قصي مش هيسيب الموضوع يعدي بسهولة ووقتها منال حاولت تلطف الجو فقالت بابتسامة بسيطة وهي بتكلم زهرة 
تعالي يا بنتي خليكي معانا مش كل يوم بنشوف حد محترم زيك يدخل بيتنا ايه رأيك تساعديني احط الاكل
زهرة بلهفة طبعا يا طنط حاضر حضرتك تؤمري
بعد فترة من وجود زهرة مع قصي ومامته كانت سعيدة اوي في الايام دي معاهم وكانت حاسة بالامان اوي وده مخليها تتغاضي عن فكرة انها تمشي وتسيبهم رغم انها عارفة انها اكيد هيجي يوم وتمشي زهرة كانت قاعدة على الكنبة في الصالة بتحاول تبعد عن عيون قصي اللي كان قاعد على الكرسي قدامها الجو كان هادي بس التوتر واضح في كل حركة منها لانها حاسة ان قصي عاوز يقول حاجة وفعلا لقته بيتكلم معاها
قصي بجدية وهو بيبصلها  
زهرة مش عاوز أضغط عليكي بس من أول يوم شفنا بعض وأنا حاسس إنك شايلة هموم كتير يوميها كنتي بتجري وكأنك هربانة من كابوس بيطاردك ممكن تحكيلي
زهرة بصت للأرض وابتدت تتهرب من نظرات قصي بتدور علي اي طريقة تمنع الكلام انه يخرج منها 
زهرة بهروب وهي تحاول تغير الموضوع أنااا مفيش حاجة الموضوع انتهى خلاص أنا حتى نسيت اللي حصل 
قصي بقوة بطلي تهربي واضح أوي إنك مش قادرة تنسي زهرة الكلام ده مش ليا ده ليكي لو مخرجتيش اللي جواكي هيفضل يتعبك انا عاوز اشاركك همك
زهرة حست قلبها بيدق بسرعة فقامت من مكانها بسرعة وراحت على المطبخ وهي بتتكلم 
قصي مش كل حاجة لازم تتحكي في حاجات لو اتحكت ممكن توجع أكتر ما تريح عشان كدة انا ساكتة
قصي راح وراها المطبخ وهو مصمم انه يعرف الحكاية
قصي بهدوء 
انا مش عاوز أوجعك أنا بس عاوز اعرفك انك مش لوحدك دلوقتي مهما كان اللي حصل معاكي
زهرة بصت له بنظرة كلها تردد كان واضح إنها بتحارب نفسها
زهرة بصوت مخنوق 
مش هتفهم صدقني قصي اللي حصل معايا مش سهل ومش هقدر أحكيه هيبقي صعب عليا لما تحكم انت كمان عليا
قصي حس بقبضة في قلبه من نبرتها المكسورة لكنه فضل هادي 
قصي بحنان 
طب جربي تحكي يمكن تلاقي حد أخيرا يسمعك من غير ما يحكم عليكي
زهرة حست بنظراته بتترجاها فدموعها بدأت تتجمع في عنيها لكنها حاولت تسيطر عليها
زهرة بصوت بيترعش 
كنت عايشة مع ناس ناس عمرهم ما شافوا فيا حاجة كويسة كل يوم كنت أسمع كلام يكسرني كنت أشوف نظرات تقول إني ولا حاجة ولما كبرت حاولت أهرب من كل ده مع اول واحد وهمني بالحب ولما وافقت واتجوزته لقيت نفسي وقعت في حياة أصعب حد بحاول يقيدني في علاقة مدمرة طول ابوقت بيقلل مني بيستنزف مشاعري كنت كل يوم بحاول أهرب من كلامه ونظراته واهانته ليا بس كل مرة كنت بفشل كان دايما يقولي اني ملكه واني مستحيل هتحرر من سجنه لحد ما في يوم لقيته جاي متعصب وبدأ يكسر كل حاجة حواليه كنت مرعوبة يا قصي منه وحتي محاولتش اعرف مالهكان كل همي اهرب من قدامه قبل ما ناره تطولني بس للاسف مقدرتش لقيته فجأة مسكني وبدأ يضربني وانا مش عارفة عملتله ايه لحد ما فهمت من كلامه اللي مش مترتب ان جالي عريس وطلبني منه ووقتها اتهمني  وفي لحظة لقيته طلقني وقتها حسيت كأني اتحررت من سجن ابدي وهربت يوميها يوم ما شوفتك كنت بهرب منه كنت خايفة يرجعني ليه بالعافية 
قصي حس كأن الكلام ضربه في قلبه انهيارها وهي بتحكي كان بيخليه يحس بالغصب من الشخص ده رغم انه ميعرفوش
قصي بصوت هادي لكنه مليان غضب مكبوت
اسمه ايه اللي كان بيأذيكي
زهرة بحزن  
مش مهم اسمه المهم إني خرجت وهربت منه لكن لسة كل حاجة بتحاصرني الخوف الكوابيس حتى الشارع 
قصي حس بوجعها كأنه وجعه بس هو حاول يسيطر على غضبه عشان ما يخوفهاش 
قصي بلطف إنتي مش لوحدك دلوقتي زهرة مش هسمح لأي حاجة تأذيكي تاني هنا في المكان ده إنتي في أمان 
زهرة رفعت عينيها ليه لأول مرة حست إن كلامه فعلا من القلب وإنه مش بيقول كده عشان يواسيها دموعها نزلت بهدوء وهي بتهمس شكرا يا قصي بجد شكرا علي كل حاجة
قصي بابتسامة صغيرة متشكرنيش واللي فات صفحة واتقفلت اوعي تفكري تفتحيها تاني ولا حتي بينك وبين نفسك فاهمة
زهرة ابتسمت بخجل وشكرته بعينيها وسابته وكانت هتمشي عشان ترجع على الصالةبس رجعت خطوة لورا بالغلط ورجليها خبطت في الترابيزة الصغيرة اللي وراها وكانت هتقع بس قصي بسرعة مد إيده ليها وحاول يسندها عشان ما تقعش فزهرة
قصي بتوتر أنتي كويسة
زهرة كانت ساكتة مش قادرة ترد بسبب قربهم المفاجئ وحست كأنها لأول مرة شايفة حاجة جديدة في ملامحه حاجة مليانة دفا وحنان
زهرة بتوتر وهي بتبعد نفسها أنا أنا آسفة مكنش قصدي
قصي بتوتر هو كمان  
خلاص المهم انك موقعتيش
زهرة حاولت تهرب بعينيها وهي تقول بصوت واطي تصبح علي خير بقي
قصي بتنهيدة وانتي من اهل الخير يا زهرة
زهرة كانت قاعدة على الكنبة في الصالة المفروض انها بتتفرج عالتلفزيون بس عنيها عالباب زي حالتها من وقت