عشقتها مشوهة بقلم اسراء ابراهيم

سكت وبص ناحية السلم اللي ليان طلعت منه و حاول يتجاهل كلام جده 
أنا طالع أوضتي ...بعد اذنك
عبدالرحمن
اطلع... بس افتكر إن كل كلمة بتقولها دلوقتي، ممكن تيجي يوم وتتمنى لو الزمن يرجع عشان تمسحها
........................................ 
ليان دخلت الشركة بخطوات ثابتة لابسة بدلة بسيطة وأنيقة ماسكة ملف في إيدها وملامحها هادية رغم التوتر اللي جواها.
أول ما دخلت مكتب سليم، لقيته قاعد ورا مكتبه بيقلب في بعض الأوراق.
سليم من غير ما يرفع عينه
اتأخرتي.
ليان بصت في الساعة
أنا وصلت قبل معادي بعشر دقايق
سليم رفع عينه ببرود
يعني أنا اللي جيت من بدري بقي ولا ايه
ليان ببرود
دي مشكلتك لان ده مش معناه إني اتأخرت
سليم قفل الملف قدامه
اقعدي
ليان قعدت وسليم حط قدامها ملف كبير
ده شغل الأسبوع اللي فات.
ليان فتحت الملف
مطلوب مني إيه؟
سليم بجدية 
تراجعي الحسابات دي كلها، وتطلعيلي تقرير بالأخطاء الموجودة فيها
ليان قلبت في الورق
كلها؟
سليم
عندك مشكلة؟
ليان بصتله
لا ....بس بسأل يعني ....انا هعمله لوحدي كمان ؟
سليم بابتسامة باردة
اه بالظبط ... لأن الشركة مش جامعة ومفيش حد هيقعد يشرحلك كل حاجة
ليان بهدوء
وأنا مش محتاجة حد يشرحلي ...انا فاهمة وعارفة كل حاجة الحمد لله
سليم بسخرية 
اما نشوف اخرة الثققة دي هتوديكي لحد فين وعلي فكرة انا مبحبش الناس اللي بتتكلم كتير قبل ما تعمل حاجة عشان بيفشلو في الاخر
ليان بثقة
بس أنا هعمل شغلي ... وساعتها مش هحتاج أقول اي حاجة اصلا لا لحضرتك ولاا لغيرك
سليم ابتسم بسخرية
طيب يا ليان... وريني شطارتك بقي
ليان قامت وشالت الملف وقبل ما تخرج وقفها سليم وقال
استني عندك
ليان وقفت
نعم؟
سليم بجمود 
أي غلطة في التقرير هتتحسب عليكي ....انتي فاهمة ؟
ليان بقوة 
وأي نجاح فيه هيتحسبلي؟
سليم بتوتر 
ده لو كان فيه نجاح أصلا
ليان ابتسمت ابتسامة صغيرة
متقلقش... ولعلمك بس ....أنا مش جاية هنا آخد شهادة منك ......انا عارفة اني تمام اوي
قالت كدة وخرجت وسليم فضل باصص للباب ثواني ودخل شريف ابن عمه المكتب وهو بيضحك
إيه يا سليم؟ شكل مراتك هتتعبك من اول يوم ولا ايه
سليم بضيق
بس هي مش مراتي في الشغل ...انت عارفني كويس
شريف بقصد 
بس هي مراتك بره الشغل ولازم متنساش ده يا صاحبي
سليم بضيق 
متبدأش يا شريف الله يهديك
شريف بتنهيدة 
أنا بس مستغرب... إنت ليه مصمم تستفزها طول الوقت؟ رغم ان ليان جميلة ورقيقة والله ومتستاهلش كدة ابدا
سليم بانفعال ملوش مبرر 
لأنها مستفزة وياريت بقي تخف كلام عنها وخليك في شغلك
شريف بغموض
انت غيرت عليها من كلامي ولاا ايه يا واد انت ؟
سليم بتوتر وغضب 
اغير ايه يا اهبل انت ...بقولك ايه انا مش فاضيلك ...يلا روح شوف شغلك
شريف بغموض
ماشي يا سيدي هعمل نفسي مصدقك ولو اني عارفك كويس بس عموما نصيحتي ليك يعني بلاش تعاقبها على حاجة هي معملتهاش؟
سليم بعصبية
لا طبعا ....أنا مش بعاقبها انا بحاول أخليها تفهم إن الجوازة دي مش معناها إني ممكن اتقبلها
شريف
وأنت فاكر هي مش فاهمة كدة ؟
سليم بصله بحيرة فكمل شريف
يا سليم... هي أكتر واحدة فاهمة إنك مش عاوزها وهي كمان زيك ومع ذلك مش بتعاملك نفس معاملتك ....فكر في كلامي واعقلها كويس ....يلا هقوم انا اشوف شغلي
خرج شريف وسليم سرح في كلامه وهو بيتنهد بحيرة وضيق
....................................
بعد أربع ساعات...
ليان رجعت لمكتب سليم وحطت الملف قدامه.
ليان
اتفضل انا خلصت يا فندم
سليم بص للساعة
خلصتي الملف كله بتااع الاسبوع في أربع ساعات؟
ليان بهدوء
ايوة
سليم فتح الملف وبدأ يقلب في الصفحات.
لثواني...دقيقة...دقيقتين...وملامحه بدأت تتغير وليان كانت واقفة قدامه مستنية
سليم باستغراب وصدمة 
إنتي عملتي التقرير ده لوحدك؟
ليان
أيوه طبعا لوحدي
سليم باستغراب اكبر 
والأرقام دي راجعتيها كلها كذا مرة ؟
ليان بثقة 
ايوة ثلاث مرات حضرتك....هو في حاجة غلط يعني ؟
سليم بص في الورق تاني.
ليان بقلق 
في مشكلة ولا ايه ؟
سليم باستغراب 
لا ....التقرير كويس.
ليان ابتسمت
كويس بس؟
سليم رفع عينه
كويس جدا
ليان بثقة
شكرا
سليم بقصد 
بس متفتكريش إنك عشان عملتي تقرير كويس تبقى بقيتي موظفة مثالية
ليان بثقة
ولا إنت تفتكر إنك عشان قولتلي التقرير كويس يبقى عملتلي معروف ....ده شغلي وانا عملته صح
سليم بغضب
أنا مقولتش كده علي فكرة
ليان
بس دي طريقتك وقصدك وانت بتتكلم انك عملت فيا معروف
سليم اتضايق
ليان ....أنا مش كل كلمة بقولها لازم تتحول لمعركة.
ليان بهدوء
وانا مش كل اهانة منك هتقولها لازم أبلعها وأسكت
سليم بضيق
بس أنا مديرك هنا
ليان
وأنا موظفة هنا وبعمل شغلي كويس جدا 
يعني لما تغلط في شغلي هرد عليك في شغلي... ولما تقيمني، قيمني على شغلي مش على شكلي
سليم سكت شوية ورد 
أنا مقصدتش اتكلم عن الندبة اللي في وشك
ليان بجمود 
لا قصدت عشان دي الحاجة الوحيدة اللي إنت شايفها فيا من زمان وحتي بعد ما اتجوزنا
سليم بتوتر وندم 
ليان أنا...
ليان قاطعته
مش مهم....بعد اذنك
سليم وهو بييلحقها بصوته 
ليان أنا فعلًا مكنتش أقصد أجرحك يومها
ليان بصتله كام ثانيةوبعدين قالت بهدوء
بس جرحتني
سليم سكت.
ليان بحزن
والفرق بين الاعتذار الحقيقي والاعتذار اللي بيتقال عشان نخلص من الموقف... إن الأول بيغير اللي بعده.
سليم باستفهام 
يعني إيه؟
ليان بتنهيدة 
يعني لو مش عاوزني براحتك....لو مش قادر تحبني، براحتك .....بس متحاولش تخليني أكره نفسي عشان إنت مش قادر تتقبلني.
وسابته وخرجت وسليم فضل مكانه، عينه على الباب ولأول مرة يحس انه كان غبي وقاسي اوي مع ليان
....................................
بليل ...ليان وقفت قدام المراية في أوضتها وبصت للندبة اللي على خدها ولمستها بإيدها وهمست لنفسها
ليان
أنا مش ناقصة...ولا معيوبة
سكتت، وعينيها دمعت وبعدين مسحت دمعتها بسرعة.
وفي نفس اللحظة...الباب اتفتح وسليم واقف عند الباب وبصلها للحظة، ولاحظ إنها كانت بتمسح دموعها.
ليان بسرعة لفت وشها
عاوز حاجة؟
سليم
كنت جاي أقولك إن جدو مستنيكي تحت.
ليان
حاضر ...نازلة
سليم فضل واقف
ليان بضيق 
في حاجة تانية؟
سليم بتنهيدة 
انا اسف بجد يا ليان ....عارف اني كنت حقير معاكي .....اتمني نفتح صفحة جديدة سوا
ليان بجمود 
اعتذارك مقبول يا سليم بس لو سمحت ملكش اي دعوة بيا..... ياريت تتجنبني لحد ما السنة دي تعدي وكل واحد يروح لحاله ..... ويلا اتفضل بقي عشان اجهز وانزل
سليم كان واقف متردد وبعدين نزل وهو من جواه حاسس انه فعلا شخص وحش اوي وكان ندمان علي كل اللي عمله
..................................... 
تاني يوم الصبح...
ليان نزلت عالفطار بدري، لقت جدها عبدالرحمن قاعد لوحده بيشرب قهوته.
عبدالرحمن بابتسامة
صباح الخير يا قلب جدك.
ليان بابتسامة هادية
صباح النور يا جدو يا قمر ..... كدة بتشرب القهوة عالريق احنا قولنا ايه بس
عبدالرحمن بابتسامة
معلش بقي انتي عارفة العواجيز اللي زيي اخدو علي كدة ....المهم سيبك مني ....انتي نمتي كويس؟
ليان بابتسامة
الحمد لله ياجدو
عبدالرحمن بص في وشها شوية
امممم متأكدة؟
ليان بضحك 
أيوه يا جدو... أنا كويسة.
عبدالرحمن بخبث
طب وسليم؟ مش هتحكيلي اهر اللاخبار بيينكم ؟هتخبي علي جدك حبيبك
ليان سكتت لحظة.
ليان ابتسمت 
هو اتكلم معايا بليل واعتذر.
عبدالرحمن براحة
الحمد لله.
ليان
وانا قبلت اعتذاره بس طلبت منه يبعد عني ونخلي كل واحد في حالله
عبدالرحمن اتصدم
طلبتي منه يبعد؟ ليه كدة بس يا ليان
ليان بصوت مخنوق 
عشان أنا تعبت يا جدو من إني كل يوم أصحى وأنا مستنية منه حاجة جديدة تخليني أحس إني مش أقل من أي واحدة تانية
عبدالرحمن
سليم غلط... وأنا عارف يا بنتي انه جرحك
ليان بدموع محبوسة
أنا مش بكرهه يا جدو والله ....انا بس مش عاوزة أعيش طول الوقت وانا مستنية إنه في يوم يتقبلني
عبدالرحمن سكت.
ليان بحزن 
أنا عاوزة السنة دي تعدي في هدوء... أشتغل، أعيش وأخرج منها وأنا لسه محافظة على نفسي وكرامتي
صوت سليم جه من وراها بعد ما سمع كل حاجة قالتها 
وده اللي هيحصل يا ليان
ليان اتوترت وبصت وراها وشافته واقف على لابس بدلته وماسك مفاتيح عربيته.
عبدالرحمن بهدوء 
تعالى يا سليم افطر
سليم قعد بس بص لليان 
أنا سمعت كلامك وهنفذ اللي طلبتيه.
عبدالرحمن بصله باستغراب
يعني إيه؟
سليم
يعني هسيب ليان في حالها واوعدك اني مش هضايقك ابدا تاني
ليان بصتله للحظة وبعدين رجعت تبص في طبقها.
عبدالرحمن بقصد 
بس متننساش انها مراتك يا سليم...
سليم قاطعه
جدي، هي طلبت ده وأنا هحترم طلبها ....عشان تتأكد اني فعلا اتغيرت واني ندمان اني جرحتها
ليان رفعت عينها له ولأول مرة تشوف
ملامح سليم اللي مكنتش فيها سخرية ولا تحدي كانت فيها جدية وندم
ليان بهدوء 
شكرا.
سليم
العفو
سكتوا وعبدالرحمن بصلهم هما الاتنين وابتسم وحس ان دي بداية قربهم لبعض 
....................................
في الشركة...ليان كانت قاعدة في مكتبها بتراجع شغلها، وشريف دخل عليها.
شريف
صباح الخير يا مدام ليان
ليان بابتسامة
صباح النور يا شريف ....وايه ام ليان دي مش واخدة عليك وانت مؤدب كدة يا ابن خالي
شريف ضحك 
لا منا لازم اتعامل مع مرات الكبير باحترام احسن يطردني وملاقيش شغل
ليان ضحكت غصب عنها
شريف
أهو ضحكتي يبقي انتي عارفة اني عندي حق 
...اصل سليم ده مفتري
ليان بابتسامة
انت كل حاجة عندك هزار كدة يابني انت
شريف بغرور مصطنع 
دي اقل امكانياتي علي فكرة ... صحيح بقولك ايه متعرفيش سليم ماله اصله من الصبح وهو شكله متضايق جدا.
ليان رجعت تبص للملف
وانا مالي.... دي مش مشكلتي
شريف
بس على فكرة، سليم مش وحش يا ليان وانا وانتي عارفين ده كويس
ليان بصتله واتوترت
أنا عارفة يا شريف .....هو بس رد فعله ده كان عشان ارتباطه بيا غصب عنه مش اكتر
شريف بتلقائية 
والله سليم اللي انا اعرفه كويس اوي محدش بيضغط عليه ولا من النوع اللي بيقبل الامر الواقع
قال كلامه وخرج وليان استغربت وسرحت في كلام شريف 
....................................
بعد الظهر...
سليم خرج من مكتبه، لقى ليان