بنت خالتي المشوهة بقلم اسراء ابراهيم حصريآ علي موقع لمحة

بتردد 
يوووه بقي... انا بصراحة حرقتي عليك خلتني مفكرتش..... وبعدين كان لازم اقطع الخيط اللي يخليها ممكن تفكر انك تبصلها تاني بعد اللي حصل.... ولا انت ممكن تفكر.... اوعي يا عبد الرحمن انا بقولك اهو
عبد الرحمن بعصبية مكتومة 
انتي بتقولي ايه بس.... هو انا لو لسة بفكر كنت قولتلك اني هخطب.... يا ماما لو سمحتي راعي اللي حصل وانها بنت خالتو يعني وبلاش تحكي حدود بينا لانهم مالهومش غيرنا لو سمحتي
نوال بضيق 
خلاص يا عبد الرحمن انا هكلم خالتك واراضيها وانت بقي عجل بموضوع خطوبتك ده انا عاوزة اطمن عليك
عبد الرحمن بسخرية 
عاوزة تطمني عليا ولا تضمني اني مش هفكر في فتون تاني..... ماما ارجوكي متخلنيش اضطر اني اخبي عليكي حاجة.... وفتون مهما حصل فهي بنت خالتي وانا لا يمكن هسيبها لو احتاجتني
نوال بتنهيدة 
اانا مبقولش نسيبها انا بس مش عاوزاك تفكر فيها تاني او تفضل تحبها لاني عارفة انها متستاهلكش انت فاهم
نفخ عبد الرحمن بضيق ودخل اوضه ووقفت نوال تبص لاثره بحيرة وهي بتقول 
يا خوفي يا عبد الرحمن تكون لسة بتحبها بعد اللي عملته فيك.... بس لا.... انا بقي مش هسكتلها لو فكرت
........................................
بعد يومين كانت ماشية فتون وهي باين عليها الحزن وكانت سرحانة ومخدتش بالها من اللي بتنادي عليها لحد ما لقت حد بيمسكها من ايديها
فتون بابتسامة وصدمة 
ايه ده فرح..... ازيك
فرح بابتسامة 
يا بنتي انا بنادي عليكي بقالي عشر سنين وانتي مش مركزة... ده انا قولت انتي مش هي وحد شبها
فتون بابتسامة 
ااسفة بجد مخدتش بالي..... انا كنت سرحانة لولا انتي مسكتيني.... طمنيني عليكي اخبارك ايه... مشوفتكيش من ايام الجامعة
فرح بابتسامة واسعة 
انا تمام الحمد لله..... خطوبتي كمان اسبوع وطبعا هتيجي.... بس قوليلي انتي اخبارك ايه انا اخر حاجة عارفاها انك هتتجوزي او اتجوزتي صح كدة
اتوترت فتوت وبصت بعيد بحزن ورجعت بصت لفرح وقالت 
اتجوزت... بس محصلش نصيب واطلقت
فرح بحزن 
يا خبر.... طب انتي كويسة انا اسفة اوي عشانك
فتون بابتسامة باهتة 
انا كويسة... المهم سيبك مني انا.... قوليلي هتعملي خطوبتك فين 
فرح بابتسامة واسعة 
في نادي شرق اكيد هتيجي ها... اصلا هو زميلي في الشغل واتعرفنا علي بعض بقي وكدة.....اساسا هو معايا هنا بس بيجبلنا عصير
فتون بابتسامة رقيقة 
ربنا يسعدكم يا فرح ... انتي تستاهلي كل خير والله
فرح كانت هتتكلم بس سمعت صوت عبد الرحمن من وراها واتفاجأت

فتون بيه جاي عليهم وقلبها وجعها اوي لما عرفت انه هو اللي فرح صحبتها بتحكليها عليه وهو لما شافها اتفاجئ ووقف مكانه وهو باصص ليها
فتون بسرعة وحزن 
طيب هسيبك انا يا فرح.... والف مبروك
فرح بسرعة وهي بتمسك ايديها 
لا استني طيب هعرفك علي عبد الرحمن هو شخصية لزيزة اوي...تعالي يا عبد الرحمن اعرفك علي صحبتي فتون..... كنا صحاب في الجامعة
عبد الرحمن كان هيتكلم بس فتون قاطعته بسرعة ووجع 
مبروك..... ربنا يسعدكم.... بعد اذنك بقي يا فرح عشان مستعجلة
قلبت كدة ومشيت ووقف عبد الرحمن يبص لاثرها بحيرة وفرح كمان استغربت اوي 
هي مالها فتون ..... الله يكون في عونها بصراحة اكيد موضوع طلاقها ده مأثر عليها... تخيل يا عبد الرحمن اطلقت علطول بعد جوازها... صعبت عليا اوي
عبد الرحمن بجدية 
فتون تبقي بنت خالتي يا فرح
فرح بتكشيرة وصدمة 
نعم بنت خالتك ازاي 
عبد الرحمن بتنهيدة 
ايوة بنت خالتي اخت امي..... وانا بقولك عشان تبقي عارفة كل حاجة
فرح باستغراب 
طب وفتون ليه مقالتليش مش فاهمة 
عبد الرحمن بجدية 
عشان هي مكنتش تعرف اني هخطب..... انا كنت لسة هقولهم
حست فرح ان في حاجة تانية غير كدة لكنها متكلمتش وسكتت وعقلها مشغول باللي حصل
..........................................
كانت فتون بتعيط في اوضتها ومش متخيلة ان اللي هيخطبها عبد الرحمن تبقي صحبتها ومش عارفة ازاي وامتي حبته اوي كدة بس اللي تعرفه انها ندمانة اوي انها اتسرعت وانها موافقتش علي عبد الرحمن وحست انها انانية اوي ولازم ترضي بنصيبها وان كان اكبر عقاب ليها بعد عبد الرحمن عنها وكفايا انها تشوفه سعيد وقررت تنساه للابد او عالاقل تتعامل معاه انه اخوها اللي وقف جمبها في محنتها وقطع تفكيرها صوت رنة تليفونها واسمه عالشاشة فمسحت دموعها وردت وهي بتعدل صوتها
فتون بهدوء 
ايوة يا عبد الرحمن ازيك
عبد الرحمن بجدية 
الحمد لله يا فتون... انتي عاملة ايه
فتون وهي بتحاول تبان عادية بس عبد الرحمن كاشفها 
انا كويسة..... احم كان في حاجة عشان كدة بتتصل
عبد الرحمن بهدوء 
مال صوتك يا فتون
فتون وهي مغمضة عنيها بحزن وبتحاول تبان طبيعية 
مالي بس... انا كويسة جدا..... كنت بشوف بس هلبس ايه في خطوبتك
عبد الرحمن باستغراب 
انتي متأكدة انك كويسة
فتون بقوة مصطنعة 
ايوة طبعا..... وبعدين بطل تعاملني علي اني طفلة.... انا مش صغيرة.... المهم كان في حاجة ولا ايه بقي
عبد الرحمن بتردد 
كنت بكلمك بخصوص اللي حصل الصبح وفرح يعني
قاطعته فتون بتلقائية وهي بتتكلم بطبيعتها 
اايوة وايه اللي حصل.... ولا قصدك ان فرح خطيبتك طلعت صحبتي بالعكس انا فرحت اوي عشانكم.... وعلي فكرة انا مرضتش اقولها اني بنت خالتك عشان متزعلش منك انك مقولتلها ان ليك بنت خالة وكدة بس اكيد لما اشوفها في الخطوبة هقولها وهوصيها عليك متقلقش
عبد الرحمن بجدية  
انتي شايفة كدة يعني
فتون بصوت مهزوز وهي بتضحك 
ايوة طبعا اومال ايه..... انت بس متشيلش هم حاجة وعلي فكرة عرفت تختار... فرح بنت جميلة ورقيقة اوي يا بختك بيها
عبد الرحمن بتنهيدة حيرة 
تمام يا فتون.... تصبحي علي خير
فتون بصوت مخنوق ودموعها بتنزل  
وانت من اهل الخير يا عبد الرحمن
قفلت بسرعة وفضلت تعيط وهي مش عارفة ازاي قدرت تبان قوية كدة رغم انها من جواها بتموت بس لازم تقفل الصفحة للابد
...................................
يوم الخطوبة كانت واقفة فتون قدام المراية وهي بتظبط الميكب بتاعها وبتحاول تداري اثار عنيها المنفوخة من العياط وكانت زي القمر بفستانها اللي لابساه لحد ما سمعت صوت امها من وراها
خيرية بحزن 
ما بلاش يا فتون تروحي.... اسمعي كلام امك يا حبيبتي
فتون وهي بتحاول تبتسم 
ليه يا ماما..... انا كويسة متخافيش عليا..... صدقيني هبقي كويسة وطبعا لازم نكون جمب خالتو في يوم زي ده
خيرية بحزن وهي بتقرب منها 
هتكدبي علي امك يا فتون.... اتا عارفة انك موجوعة وندمانة وانك بتحبي عبد الرحمن
فتون بصوت مهزوز وهي بتبتسم 
متقلقيش ...... انا خلاص بدأت اتأقلم اني لازم اكون بعيد .... عبد الرحمن من هنا ورايح اخويا فعلا يا ماما زي ما كنت شايفاه زمان... ارجوكي ساعديني اكمل علي كدة
خيرية بحنية 
علي عيني اشوفك مطفية كدة يا ضنايا.... يلا بينا
مشيت فتون مع امها وراحو القاعة اللي كانت كبيرة وفيها ناس كتير فكانت فتون بتدور بعنيها عليه لحد ما شافته واقف جمب فرح فقلبها وجعها ومسكت ايد امها اللي طبطبت عليها بحزن وراحو هما الاتنين يسلمو عليهم ووقتها لمحها عبد الرحمن اللي عنيه اتثبت عليها وكأنه كلن بيدور عليها هو كمان وكانت دقات قلبه بتكدبه انه لسة بيحبها بس للاسف مينفعش خلاص فات الاوان...... وقفت قدامهم وعلي وشها ابتسامة باهتة
فتون بابتسامة 
مبروك يا عبد الرحمن..... مبروك يا فرح..... اكيد عبد الرحمن قالك اني بنت خالته.... معلش بقي انا مرضتش اقولك اخر مرة عشان خوفت تزعلي منه انه معرفكيش انه ليه بنت خالة
فرح بابتسامة واسعة 
وهزعل ليه بس... بالعكس انا فرحت ان بنت خالته طلعت صحبتي
فتون وهي بتحاول تقاوم دموعها 
انا وصيته عليكي علي فكرة ولو زعلك انتي بس قوليلي وانا هقرصلك ودنه
ضحكت فرح وعيون عبد الرحمن كانت متثبتة عليها وكأنه بيحاول يقراها ويعرف هي جواها ايه 
نوال بابتسامة واسعة  
عقبالك يا فتون
فتون بابتسامة 
شكرا يا خالتو
خلصت ومشيت وهي بتدعي ربنا انها متنهارش ودموعها تخونها قدامهم فخرجت بسرعة من القاعة ووقفت في مكان لوحديها تتنفس بعمق كتير اوي لحد ما سمعت صوت شاب من وراها
انتي كويسة يا انسة
فتون لفت بخضة 
انت خضتني..... انا كويسة... متشكرة تقدر تتفضل
الشاب بابتسامة 
اانتي بتطرديني.... يعني ده حتي عيب لاني قلقت عليكي لما لقيتك بتعيطي وجيتلك اشوفك
فتون بضيق 
وتقلق عليا ليه من بقية عيلتي لو سمحت امشي من هنا وكفايا كدة بقي
الشاب باصرار ونظراته كلها اعجاب 
طيب ايه رأيك تقوليلي مالك وانا اوعدك اسيبك وامشي بعد كدة.... وعلي فكرة انا مش بعاكس بس حقيقي عندي فضول اعرف انتي بتعيطي ليه
فتون بصتله بغضب وسابته وكانت هتمشي بس هو فاجأها لما كان هيمسك ايديها عشان يلحقها وهي لفت وشها عشان تزعقله بس لقت اللي بيسحبه بعيد عنها وبيضربه بغضب وكان عبد الرحمن اللي ملامحه كانت كلها غضبت
فتون بخوف 
عبد الرحمن خلاص بالله عليك... سيبه
هو مكنش سامعها والغضب عاميه وبيضرب الشاب لمجرد انه فكر يلمسها ولما الشاب جري بصلها عبد الرحمن بغضب وقرب منها وهو بيزعق ليها
انتي واقفة هنا لوحدك لييييه عاجبك اللي بيعاكسك ده
فتون بدموع وهي بتبص في عنيه 
انا مقولتلوش يضايقني... انا خرجت اخد نفسي المكان جوا خانقني يا عبد الرحمن انا مغلطش
وقف بتنفس بعصبية وقالها وهو مقرب اوي منها 
انتي عارفة لو كان لمسك انا كنت عملت ايه
فتون وهي مركزة في عيونه 
عارفة.... وانا اسفة اوي
غمض عبد الرحمن عيونه وهو قريب منها كدة وبعدين بعد عنها بصعوبة وقالها بجمود 
يلا ادخلي جوة ومتقعديش لوحدك تاني انتي فاهمة
فتون وشبح ابتسامة علي وشها رغم وجعها  
حاضر
..................................
بعد فترة كان واقف عبد الرحمن سرحان وهو باصص بعيد وامه قاعدة متابعاه وبتبصله بغموض
نوال بتردد 
صحيح يا عبد الرحمن..... انت مخرجتش مع خطيبتك ليه من يوم الخطوبة يعني زي ما بيعملو الخطاب
عبد الرحمن بتنهيدة 
منا كل يوم بشوفها في الشغل يا امي وعادي يعني مش ضروري اوي موضوع الخروج ده
نوال بقصد 
طيب ما ايه رأيك نعزمهم عندنا مرة واهو نتعرف عليهم اكتر
عبد الرحمن برفض 
ملوش لزوم يا ماما... انا مبحبش جو العزومات ده وبعدين كدة هنبقي نخرج لما نجيب العفش 
نوال بسخرية 
وده انتي ده...